Emprego dos "EVA" na aula: QuizStar

Os EVA (Entornos Virtuais de Aprendizaxe) son espazos creados con tecnoloxía electrónica onde se levan a cabo unha serie de actividades de aprendizaxe nas que os participantes teñen acceso a unha gran cantidade de actividades na rede. O principal obxectivo destes espazos é favorecer a participación, mediante a potenciación da comunicación entre os participantes, da interacción social e da construción compartida de significados.

Neste sentido, unha vez analizados os diferentes exemplos de EVA que se nos presentan decidín que no meu caso, tendo en conta que este blog está dirixido a un alumnado de 2º da ESO, realizaría unha actividade coa ferramenta QuizStar.

QuizStar é un ferramenta que permite crear probas cortas en liña: preguntas de verdadeiro/falso; resposta múltiple; ou resposta corta. No meu caso, empregaríaa como método de repaso do aprendido por parte do alumnado. Durante un trimestre, ao final de cada semana crearía unha proba corta que sirva de repaso do ensinado durante esa semana; polo tanto, empregaríaa como unha alternativa aos deberes tradicionais.

Por un lado, o alumnado deberá realizar a proba e poderá autocorrixirse, de maneira que aprenda dos seus erros e adquira os conceptos e os contidos esperados. Por outro lado, o profesorado poderá obter unha visión individualizada do proceso de ensino-aprendizaxe de cada estudante. O emprego destas plataformas en liña en lugar dos métodos tradicionais incrementa a motivación do alumnado, xa que permite unha aprendizaxe máis amena e dinámica.