Centro de Formación Padre Piquer

No Centro de Formación Padre Piquer (Madrid) a innovación baséase en aulas cooperativas multitarea. A aula cooperativa non está organizada por materias, senón por ámbitos de ensinanza e aprendizaxe (socio-lingüístico e científico-tecnolóxico) e trabállase seguindo tres principios metodolóxicos: a aprendizaxe cooperativa; a aprendizaxe baseada en problemas da vida real; e o uso das TIC. Neste centro tamén se pasa das aulas tradicionais a novos espazos moito máis grandes que integran ata a 60 estudantes e a varios profesores á vez. Polo tanto, a metodoloxía deste centro tamén se centra na combinación do traballo en equipo co traballo individual que respecta os ritmos de cada estudante; na proporción dunha educación individualizada; e no emprego das novas tecnoloxías.

Por un lado, o feito de que as clases estean formadas tantos estudantes, pero que estes estean atendidos e titorizados por varios docentes paréceme interesante, pero á súa vez tamén pouco realista para levalo a cabo nos centros públicos pola inversión que require. Pola contra, a idea de desenvolver unha aprendizaxe individualizada que respecta os ritmos de aprendizaxe de cada alumno e que distribúe as tarefas de xeito que todos poidan progresar si que me parece un exemplo de innovación metodolóxica, polo que si que me parecería interesante poder involucrarme neste tipo de metodoloxía no meu futuro como docente.

Ademais, no tocante ao profesorado tamén me resulta interesante que varios docentes compartan a mesma aula, xa que isto permítelles compartir as súas ideas e establecer debates para chegar a acordos. Considero que este traballo colaborativo beneficia e enriquece o proceso de ensino-aprendizaxe, posto que da lugar a ideas compartidas moito máis creativas, así como ao emprego das técnicas e metodoloxías máis adecuadas para cada situación.

Finalmente, en canto ao emprego das TIC, esta metodoloxía pode ser moi beneficiosa para a aprendizaxe, pero ao igual que no centro comentado anteriormente, quizais é pouco realista e pode dar lugar a unha carencia do coñecemento da ortografía real.